ی j, y
10.01.2013 11:05
ی j, y
- ئیدیۆم و گوزارەی تایبەت
- idiom, idioma, idios, Idiomatik, Idiolekt, Idiot-ism
زاراوەی |ئیدیۆم| بە یۆنانی |ئیدیۆمە| دەچێتەوە سەر بنەڕەتی وشەی |ئیدیۆس| واتا تایبەت، تایبەتمەند، خۆیی و خۆماڵی. لێرەوە ئیدیۆم واتا گوزارەی تایبەت، دەربڕینی تایبەت، وتە و پەند و قسەی نەستەقی خۆماڵی و گوزارەی تایبەتمەندی زار و شێوەزار
لەودیو |ئیدیۆم|ەوە سەرگوزشتەی پێشینە و دیرۆکی پێشینانە هەیە، ئەگەر بەسەرهاتی ئەو چیرۆکە نەزانین، ئیدی لەو گوزارە تایبەتەش ناگەین. هەر زمانێک یان شێوەزارێک ئیدیۆمی خۆی هەیە، جاروبار ئیدیۆم سنوری گیۆگرافیی خۆی دەبڕێت و دەبێتە گوزارەیەکی جیهانی وەک وتەی حیکمەت و پەندی دێرین
چەمکی |ئیدیۆماتیک| بەشێکی زانستی زمانە، توێژینەوەی سەرجەم وتە و پەند و دەربڕینی تایبەتمەندی زارێک و گوزارەی تایبەتی شێوەزارێکە
شێوەزار، دیالێکت یان لەهجە زاراوەی تایبەتی خۆی هەیە، بەڵام هەمو زاراوەیەکی خۆ ئیدیۆم نیە. لەهجە گوزارەی تایبەتی خۆی هەیە، بەڵام هەمو گوزارەیەکی خۆ ئیدیۆم نیە. خۆ بە لەهجەی سۆرانی ناوترێت ئیدیۆمی سۆرانی، بەڵکو دیالێکت یان لەهجە کەم تا زۆر خاوەن هەندێ ئیدیۆم و گوزارەی تایبەتە
چەمکی |ئیدیۆلێکت| بە شێوازی زاری کەسێک یان باندێک دەوترێت کە گوزارەی تایبەت و وتەی سەیر و دەربڕینی سەمەرە بە قسەکانیەوە دیار بێت، بە تایبەتی لە لێکۆڵینەوەی تاواندا زۆرجار لەڕێی ئیدیۆلێکتەوە تۆمەتبار دۆزراوەتەوە
چەمکی |ئیدیۆت-یسم| واتا کاڵفامی، کەم-ئاوەزی، بێدەماخی، بێعەقڵی، کە لە سەرەتای سەدەی بیستەمدا پانتاییەکی گەورەی لە کایەی پزیشکی و دەرونناسیدا زەوت کردبوو، ئەم چەمکە دەچێتەوە سەر هەمان بنەڕەتی وشەی یۆنانی |ئیدیۆس| واتا تایبەت و تایبەتمەند. وشەی |ئیدیۆت| واتا کەسی تایبەت کە قانون لەوی بوردوە و ئەرکی لە سەر نیە، بە عەرەبی پێی دەڵێن: ئەبلە، ئەحمەق، موخەبەڵ و عەتە واتا گەوجە، گەمژە، گەمشۆ، کەمشۆ، گەلحۆ، دەبەنگ، گێل، حۆل، حەپۆل، کەمفام، کاڵفام و نەفام
ئەمڕۆ هەمو ئەم وشانە لە کایەی زانستدا بەسەرچون و بونە تەپوتۆزی زەمانە
******